Մեկտեղելով իր մեծ սերն արվեստի ու Հայաստանի նկատմամբ՝ Սոնյան որոշեց ստեղծել սեփական ապրանքանիշը՝ Sonmade-ը։
Սոնյան փոքրուց հետաքրքրված էր արվեստի տարբեր ճյուղերով՝ կավագործությամբ, նկարչությամբ, նույնիսկ ինտերիեր-դիզայնով։ Նրան նաև շատ հետաքրքրում էին տարբեր երկրների մշակույթներ, որոնք ավելի խորությամբ ուսումնասիրելու համար ընդունվեց Հայ-ռուսական համալսարան՝ ստանալով զբոսաշրջության բակալավրի կոչում։
Սեփական փոքր բիզնեսը սկսելու ներշնչանքն այցելեց մի օր, երբ Սոնյան ընկերների հետ ցանկանում էր կտորե պայուսակ պատվիրել՝ որոշակի ձևավորմամբ։ Երբ այդպես էլ չկարողացան գտնել այն, ինչ փնտրում էին, Սոնյան ընդունեց դա որպես մարտահրավեր և որոշեց ինքը պատրաստել փնտրած ձևավորումով կտորե պայուսակը։
Սեփական աշխատանքի արդյունքներից ոչ միայն ինքն էր տպավորված․ բոլոր ընկերները հիացած էին։ Հենց այս փոքրիկ դրվագն էլ Sonmade-ի ստեղծման հիմք դարձավ։
Սկզբում Սոնյայի ապրանքանիշն առաջարկում էր միայն ձեռագործ կտորե պայուսակներ․ նրա մայրն Արցախում ձևվածքն էր անում, իսկ Սոնյան պատվերներ էր ընդունում և նկարում պատրաստ պայուսակների վրա։ Այժմ՝ տարի և կես անց, Սոնյայի ապրանքանիշն առաջարկում է մոմեր, Պալո Սանտո և այլ բնական բուրավետիչների բազմազանություն։
Վերջերս Sonmade-ը թողարկեց իր առաջին՝ «Թաքնված երազների հավաքածուն»։ Իր կյանքի մեծ մասն անցկացնելով Արցախում՝ Սոնյան առաջին հավաքածուն նվիրել է Արցախի Աստղաշեն անունը կրող գյուղական բնակավայրին։ Հավաքածուն կապվում է գյուղի հետ, քանի որ դրանում ներառված արտադրանքը նմանեցված է այնտեղ գտնվող աստղանման քարերին, որոնք արվեստագետը նաև օգտագործում է իր աշխատանքներում։ Աստղաշենի աստղիկները շուրջ 150 մլն տարվա հնություն ունեն․ դրանք ծովային բրածո կենդանիների մասնիկներ են։
Հավաքածուում ներառված են աստղաձև մոմեր և խեցեղեն իրեր․ Սոնյան ամենը սեփական ձեռքերով է պատրաստում։ «Այս հավաքածուն ինձ մանկությունս է հիշեցնում։ Սիրում էի գնալ Աստղաշեն ու հիանալ փոքրիկ, հրաշալի աստղաձև քարերով»։
Սոնյան հույսի ունի, որ իր առաջին հավաքածուն ուշադրություն կհրավիրի Աստղաշենի, Արցախի և Հայաստանի վրա, մարդկանց մոտ այս վայրերն այցելելու և իրական քարերը տեսնելու ցանկություն կառաջացնի, և, որ ամենակարևորն է, կօգնի ճանաչել հայերի հարուստ մշակույթն ու պատմությունը։
Իր փոքրիկ բիզնեսի զարգացմանը զուգահեռ, Սոնյայի ամենանվիրական ցանկություններից մեկը հայկական ապրանքանիշերն ու արտադրանքն աշխարհում ճանաչելի դարձնելն է։ Սոնյան սատարում և խրախուսում է բոլոր հայկական ապրանքանիշերին, տեղական փոքր ձեռներեցությանը։ Նա հավատում է, որ նույնիսկ փոքր քայլերով կարելի է աջակցել Հայաստանի տնտեսական զարգացմանը, հարուստ և եզակի մշակույթի ճանաչմանը և, ի վերջո, Հայաստանը դարձնել հայտնի զբոսաշրջային վայր։
